Henrico, illustri Anglorum regi, Bernardus, abbas dictus de Claravalle: caelorum Regi de terreno regno servire fideliter et humiliter oboedire.

In terra vestra tenetur praeda Domini mei atque vestri et illa praeda pro qua maluit mori quam carere illa. Ego eam sequi disposui, et mittere de nostra militia, qui in manu valida, si vobis non displicet, requirant, recuperent, reducant. Et nunc huius rei gratia praemisi hos quos praesentes cernitis exploratores, qui esse rei indagent sagaciter renuntientque fideliter. Assistite eis tamquam nuntiis Domini vestri, et in ipsis feudum vestrum deservite. Ipse yero ad honorem suum, ad salutem vestram, ad patriae sospitatem et pacem, laetum vos et inclytum perducat in bonum ac placidum finem.